Tirane, 17 shtator 2014 – Presidenti i Republikës, Bujar Nishani priti sot në një takim Zëvendëskryetarin e Knesset-it(Parlamentit të Shtetit të Izraelit), zotin Hamad Amar, njëkohësisht Kryetar i Grupit të Miqësisë Izrael-Shqipëri, dhe delegacionin që e shoqëron.

Presidenti Nishani rikonfirmoi nivelin e shkëlqyer të marrëdhënieve ndërmjet dy vendeve tona dhe shtoi se vizitat e fundit dhe veprimtaritë e përbashkëta po i shërbejnë forcimit të mëtejshëm të miqësisë tradicionale dhe bashkëpunimit politik, ekonomik dhe kulturor ndërmjet Shqipërisë dhe Izraelit, duke veçuar edhe rolin e veçantë të diplomacisë parlamentare dhe grupeve të miqësisë në këtë drejtim.

Ndiq "Izraeli Biznes" në Facebook dhe Twitter dhe Instagram dhe behu anetar i Grupit Izraeli dhe Shqiptaret

Zëvendëskryetari i Knesset-it, Amar tha se të gjithë hebrenjtë e vlerësojnë me mirënjohje atë që shqiptarët bënë për shpëtimin e tyre gjatë periudhës së Holokaustit. Duke u ndalur në të ardhmen e bashkëpunimit shqiptaro-izraelit, ai u shpreh se ka një interes në rritje të biznesmenëve nga Izraeli për Shqipërinë veçanërisht në fushat e energjisë, kërkimit të naftës dhe gazit, turizmit dhe bujqësisë, ku ka mundësi të mëdha zhvillimi.

Bashkëbiseduesit shkëmbyen mendime për situatën e sigurisë, për sfidat që lidhen me veprimtarinë e grupeve terroriste dhe për bashkëpunimin për përballimin e tyre.