Presidenti Bujar Nishani i ka hapur rrugë emërimit të ambasadorit shqiptar në Izrael, ndërsa vijon të bllokojë shkarkimin e dy ambasadorëve, Mal Berishën në Londër dhe Neritan Cekën në Romë.

Presidenti Nishani ka dekretuar dje miratimin e Bardhyl Canajt si përfaqësuesi diplomatik i Shqipërisë në Izrael.

Emërimi i diplomatit në Izrael është mbajtur i bllokuar nga Presidenti Nishani prej disa muajsh, kohë kur Ministria e Jashtme hartoi një ligj të ri për shërbimin diplomatik dhe emërimin e ambasadorëve shqiptarë në shtetet e huaja. Presidenti ka argumentuar bllokimin me argumentin se qeveria nuk konsultohet me të për emërimet.

Ndërkohë, Bardhyl Canaj ka qenë një nga tre emrat e propozuar nga Ministria e Jashtme dhe njëkohësisht nga qeveria për ambasador, së bashku me Visar Zhitin si i propozuari i qeverisë në Vatikan dhe Fatos Rekës në Maqedoni.

Për të tre këta emra, Presidenti Nishani pati deklaruar se nuk do t’i dekretonte për shkak të mungesës se konsultimit me ministrin e Jashtëm. Fatos Reka mori firmën e Presidentit, vetëm pas ngjarjeve të rënda në Kumanovë dhe pas disa thirrjeve edhe nga deputetët e Partisë Demokratike