Birra “Korça” vijon të qëndrojë në krye të klasifikimit, jo vetëm si një investim madhor, por edhe si produkt cilësor. Një tjetër vlerësim që e krahason pastërtinë e saj me ajrin, ka ardhur nga ambasadori i Izraelit, çka konfirmon se birra “Korça” mbetet më e mira mes pijeve elitare dhe jo vetëm.

Diplomati izraelit, Boaz Rodkin, teksa ka vizituar fabrikën “Birra Korça”, duke vlerësuar investimin që është kryer në këtë fabrikë, ka shprehur përshtypjet e tij, dhe ka konfirmuar se birra “Korça” është emri më i lakuar në çdo tryezë.

I shoqëruar nga presidenti i kompanisë, Irfan Hysenbelli, ambasadori Rodkin ka vlerësuar jo vetëm investimin, por edhe aspektin social, pasi një biznes i tillë ka bërë të mundur punësimin e dhjetëra qytetarëve.

Ai madje nuk ka nguruar as ta rendisë teknologjinë dhe investimin në nivelet botërore, duke iu bashkuar kështu vlerësimeve të shumta, të cilat pa diskutim e cilësojnë birrën “Korça” si më të mirën. Gjatë vizitës së tij, Boaz Rodkin nuk ka lënë pa provuar edhe shijen e birrës “Korça” të sapoprodhuar.

Ambasadori izraelit ka theksuar gjithashtu se personat që kryejnë investime gjigante nuk përkrahen siç duhet, qoftë edhe nga drejtësia, e cila lë për të dëshiruar në Shqipëri.

“Kisha shumë dëshirë të vizitoja ‘Birrën Korça’, e cila ka punësuar shumë njerëz në administratën e saj. Teknologjia që ata përdorin është shumë e mirë, shumë moderne dhe e sofistikuar, prandaj mund të them që është teknologjia më e mirë, e njëjta që përdoret edhe në vendet e tjera të botës. Unë provova birrën dhe i thashë presidentit Hysenbelli që kam jetuar në Irlandë dhe pozicioni im i parë ka qenë atje. Them që birra është në të njëjtin nivel me ajrin që kemi provuar atje. Unë u kënaqa shumë në Korçë dhe pritja e ngrohtë ma bëri më të lehtë këtë ditë”, u shpreh ambasadori.

“Përtej kësaj, investuesit e mëdhenj jo gjithmonë përkrahen edhe nga Drejtësia. Edhe pse nuk jam shumë i familjarizuar në çështjet juridike, sistemi gjyqësor, siç edhe Ambasada Amerikane e përmendi në deklaratën e saj, nuk është siç duhet. Unë e kam vënë re që shteti shqiptar ka vërtet probleme me sistemin gjyqësor”, deklaroi kreu i diplomacisë së Izraelit në Shqipëri.