NATO-ja do të njohë një përfaqësues zyrtar të Izraelit dhe do t’i garantojë Izraelit një zyrë të përhershme në selinë e tij në Bruksel, njoftoi Ministria izraelite e Punëve të Jashtme.

“NATO-ja ka njoftuar Izraelin se ai mund të hapë një zyrë në selinë e organziatës dhe të plotësojë procesin e prezantimit të kredencialeve të përfaqësuesit të tij në NATO”, thuhet në këtë njoftim të Ministrisë së Punëve të Jashtme.

Ky rezultat erdhi pas përpjekjesh të gjata diplomatike nga ana e Izraelit, i cili është një partner por jo një anëtar i Aleancës së Atlantikut.

Ambasadori izraelit në Bashkimin Evropian, David Walzer, shërben gjithashtu si përfaqësues në NATO, por deri tani misioni izraelit nuk është njohur zyrtarisht nga Aleanca.

Disa shtete anëtare të NATO-s i janë kundërvënë një bashkëpunimi të ngushtë me Izraelin, duke argumentuar se mund të dëmtojë marrëdhëniet me vendet myslimane.

Deri tani 28 vendet anëtare të Aleancës kanë rreth 40 shtete partnere.