(Izraelisot) – Me ftesë të “Ruppin Academic Center”, Ambasadori i Shqipërisë në Izrael, Bardhyl Canaj, zhvilloi një takim tejet të frytshëm me Presidenten, Prof. Galia Sabar, Dekanin e Fakultetit Ekonomik dhe Administrimit të Biznesit, Prof. Moshe Justman, si dhe me Drejtoreshën për Marrëdhëniet me Jashtë, Merav Sar-El.

Biseda u fokusua në gjetjen e rrugëve për bashkëpunimin me Universitetet dhe Institucionet Akademike shqiptare.

Eksperienca dhe përvoja e Ruppin Academic Center në fushat e Informatikës së biznesit, menaxhimit të financave, sistemit bankar dhe raporteve mes biznesit dhe ligjit përbën një urë mbresëlëse për implementimin dhe marrjen si model tek institucionet homologe shqiptare.

U ra dakord për organizimin e seminareve dhe konferencave shkencore të përbashkëta, lidhjeve me Universitetet shqiptare për shkëmbime pedagogësh, leksione të përbashkëta online, kryerjen e studimeve Master si dhe mbajtjen e kurseve verore për studentët shqiptarë në disiplinat e mësipërme.