Alibaba, gjiganti kinez i e-commerce, bëri të ditur se ka blerë startupin izraelit, Visualead, i specializuar në teknologjinë që gjeneron kodet e personalizuara, të njohura si “QR code”, kundër falsifikimit.

Burime të afërta me marrëveshjen i thanë portalit financiar izraelit të lajmeve Calcalist.com se, blerja ishte me vlerë dhjetëra miliona dollarë.

E themeluar në vitin 2012, kompania me qendër në Herzliya, krijon kodet unike QR që mund të skanohen nga smartphones.

Kodet e Visualead përfshijnë përdorimin e ngjyrave në dizenjot e tyre, të cilat ndryshojnë nga kodet standarde të zezë dhe të bardhë që tashmë janë në treg.

Për gjigantin kinez Alibaba, të njeriut më të pasur në Kinë, Jack Ma,  kjo ishte blerja e parë e një kompanie izraelite.

Marrëveshja është në vijim të planit të Alibaba mbi hapjen e një qendre kërkimore dhe zhvillimi në Izrael, si pjesë e mega planit të kompanisë prej 15 miliardë dollarësh, për të krijuar një sërë qendrash kërkimore dhe zhvillimi në mbarë botën .

Me nisjen e qendrës së re të kërkimit dhe zhvillimit të Izraelit, Alibaba bashkohet me gjigantët e tregtisë si Amazon dhe eBay, si dhe më shumë se 300 kompani ndërkombëtare që tashmë posedojnë struktura në tokën izraelite.