Ai kërcim, ose më saktë ai fluturim, është imazhi i njërit prej golave që kanë mbetur në historinë e Botërorëve të futbollit: goditja me kokë e Oman-Bijk, në minutën e 67-të të ndeshjes Argjentinë-Kamerun, më 8 qershor të 1990-ës, në Milano, par 74.500 spektatorëve.

Një gol, që në ditën e hapjes së Italia 1990, regjistroi surprizën më të bukur të Botërorëve: kampionët e botës munden nga një vend afrikan, që merrte pjesë për herë të dytë në një Kupë Bote.

Kameruni e mbylli me 10 vetë atë ndeshje, sepse Kana-Bijk dhe Masing u ndëshkuan me karton të kuq nga francezi Vautrot. Por gjuajtja me kokë e Fransua Oman-Bijk, i cili sot është 52 vjeç, nuk është surpriza e vetme në ditën e hapjes së Botërorëve të futbollit, sepse ky sport magjik ka edhe momente të tjera të paharrueshme.

Në vend të dytë të surprizave është një tjetër vend afrikan, Senegali, i cili dominoi totalisht dhe fitoi 1-0 ndaj Francës kampione më 31 maj të 2002-shit në Seul. Goli u shënua pas 30 minutash lojë nga Buba Diop, i cili realizoi i ulur nga vendi, pas një topi të devijuar nga Bartez. Franca, që kishte goditur shtyllën më parë me Trezege, rrezikoi të pësonte golin e dytë në pjesën e dytë, por traversa i tha “Jo” Fadigasë.

Në vend të tretë të surprizave është fitorja 1-0 e Belgjikës ndaj Argjentinës më 13 maj të vitit 1982, në “Camp Nou”. Goli i Ervin Vandenberg, mposhti kampionët e botës. Kontroll perfekt dhe gjuajtje e pakapshme nga lojtari i Belgjikës. Maradona goditi traversën.

Rusi 2018 hapet sot me ndeshjen mes të zotëve të shtëpisë dhe Arabisë Saudite. Favoritë janë të besuarit e Çerçesov dhe rezultati 2-0 duket më i mundshmi sipas specialistëve.