Princi britanik William vizitoi Murin e Lotëve (Murin Perëndimor) dhe Malin e Tempullit në Jerusalem, në ditën e tij të fundit të vizitës treditore në Izrael dhe Bregun Perëndimor.

Sipas traditës, me një kipa të zezë të vendosur në kokë, ai vendosi dorën e djathtë mbi gurët antikë dhe më pas ai futi midis gurëve një letër me një mesazh në të.

Mbreti i ardhshëm i Anglisë, i shoqëruar nga rabinin e Murit të Lotëve, Shmuel Rabinoviç, qëndroi disa momente i vetëm përballë murit, ndërsa momente më pas la edhe një shënim në librin e vizitorëve.

“Le ta bekojë Zoti paqen në këtë rajon dhe në të gjithë botën”, shkroi Princi William.

“Sot kemi përjetuar një moment historik që do të jetojë gjatë në kujtesën e hebrenjve anembanë botës”, tha Kryerabini i Britanisë, Efraim Mirvis, i cili e shoqëroi princin në vizitën e tij.

“Muri Perëndimor qëndron në epiqendrën e besimit tonë. Të shikosh monarkun e ardhshëm për të paguar respektin e tij ishte një gjest i mrekullueshëm miqësie dhe një shenjë e respektit të Dukës për shenjtërinë e Jerusalemit”, tha kryerabini Mirvis.

Më herët princi vizitoi varrin e stër-gjyshes së tij, Princesha Alice e Battenberg në Malin e Ullinjve. Princesha Alice shpëtoi një familje hebreje gjatë Holokaustit dhe u varros në varrezat e Jerusalemit në fund të viteve 1980.

Princi qëndroi solemnisht nga varri i stër-gjyshes së tij, i shoqëruar nga një klerik ortodoks rus. Pastaj atij iu dhanë disa dhurata nga kleri ortodoks, duke përfshirë një buqetë me lule dhe një kryq.

Me homazhet e kryera, William ndoqi gjurmët e babait të tij Charles, Princi i Uellsit dhe gjyshi Philip, Duka i Edinburgut, të cilët e kishin vizituar edhe varrin e Princeshës Alice.

Vizita e Dukës së Kembrixhit përbën edhe vizitën e parë zyrtare të një anëtari të familjes mbretërore që nga përfundimi i mandatit britanik dhe themelimi i shtetit të Izraelit në vitin 1948.

Princi William, i cili është i dyti në rresht për fronin britanik, u takua më parë edhe me presidentin e Izraelit, Reuven Rivlin, si dhe me kryeministrin Benjamin Netanyahu, si dhe me presidentit të Autoritetit Palestinez, Mahmud Abas.