Kryeministri hungarez Viktor Orban, një nacionalist, politikat e të cilit kanë ngritur shqetësime mes hebrenjve në vendin e tij, tha në një vizitë në Izrael të enjten se ata duhet të ndjehen të sigurt nën qeverinë e tij.

Në një vizitë reciproke në Izrael, një vit pas pritjes së Kryeministrit Benjamin Netanjahu në Budapest, Orban ripohoi se Hungaria do të tregonte “zero tolerancë” për antisemitizmin.

“Të gjithë qytetarët hebrenj në Hungari janë nën mbrojtjen e qeverisë. Ne jemi krenarë që në Hungari hebrenjtë vetëidentifikohen, që festojnë dhe ruajnë traditën hebraike. Unë garantoj se ata mund të ndihen të sigurt”, deklaroi Orban.

Vitin e kaluar, Orban ngriti shqetësime në bashkësinë hebraike të Hungarisë kur lavdëroi Miklos Horthy, një aleat i Hitlerit dhe përdori një imazh të financuesit amerikan hebre, Xhorxh Soros, në një fushatë reklamash kundër emigracionit. Kongresi Botëror i Hebrenjve vlerëson popullsinë hebre në Hungari në mes 75,000 dhe 100,000 personash.

Netanyahu dhe Orban, të cilët fituan një mandat të tretë në detyrë në prillin e kaluar, kanë gjetur shkak të përbashkët për çështjen e Soros, të lindur në Hungari dhe mbështetjen e tij për organizatat joqeveritare që kanë kritikuar politikat e qeverive të tyre.

Përqafimi i Netanyahut nga Orban ka prodhuar kritika nga politikanët e opozitës izraelite dhe është pritur me habi në Bashkimin Evropian, ku kryeministri hungarez konsiderohet si një kundërshtar.