Guatemala njoftoi përurimin e një rruge të tretë në vend të quajtur “Jerusalemi – Rruga e kryeqytetit të Izraelit”.

Rruga ndodhet në komunën e Tiquisate në qytetin e Escuintla, i gjashti më i madh në vend, bëri të ditur Aurora-Izrael javën e kaluar.

Raporti tha se kjo iniciativë u nxit nga ambasadori izraelit, Mattanya Aharon Cohen, i cili u bëri thirrje kryetarëve të bashkive në Guatemalë për ta zgjeruar këtë nder në qytetet e tyre.

“Unë jam i lumtur dhe krenar që Guatemala është ende një mik i vërtetë i Izraelit dhe është deri më tani i vetmi vend në botë ku ka rrugë me emrin ‘Jerusalemi – kryeqyteti i Izraelit'”, tha ai.

Ndërsa shumë vende kanë rrugë me emrin Jeruzalem, Guatemala është i vetmi vend me rrugë që njohin Jerusalemin si kryeqytetin e Izraelit, shkruan portali izraelit, United with Israel.

Kjo vjen vetëm disa muaj pasi vendi e zhvendosi ambasadën e tij në Izrael nga Tel Avivi në Jerusalem.

Marrëdhëniet ndërmjet Izraelit dhe Guatemalës janë forcuar ndjeshëm gjatë vitit të kaluar, duke përfshirë disa takime midis presidentit të Guatemalës Jimmy Morales dhe kryeministrit Benjamin Netanyahu, ndërsa pritet një vizitë të mundshme të presidentit izraelit, Reuven Rivlin, në Guatemalë në vitin 2019.