Ministri izraelit i Mbrojtjes, Avigdor Liberman, deklaroi se Izraeli i kishte shteruar përpjekjet për të arritur një marrëveshje me grupin terrorist Hamas për t’i dhënë fund muajve të dhunës përgjatë kufirit me Rripin e Gazës dhe se kishte ardhur koha që kabineti të merrte një vendim mbi veprimin ushtarak.

Komentet e Liberman erdhën disa ditë pas një sulmi raketor palestinez në Be’er Sheva që solli një seri sulmesh ajrore izraelite mbi objektivat në Gaza, shkruan “The Times of Israel”.

Ndërmjetësit egjiptianë dhe Kombet e Bashkuara kanë punuar për të arritur një marrëveshje midis të dy palëve për të qetësuar situatën.

Duke folur në fillim të një takimi të Komitetit të Punëve të Jashtme dhe të Mbrojtjes të Knesset, Liberman tha se qëllimi ishte kthimi i situatës në mënyrën se si ishte përpara fundit të marsit, para se palestinezët në Gaza të fillonin protesta javore të dhunshme në kufi.

“Ne i kemi konsumuar të gjitha opsionet, dhe tani është koha për të marrë vendime”, tha ai. “Pozicioni im është shumë i qartë: Ne duhet të bëjmë një goditje të fuqishme ndaj Hamasit – kjo është mënyra e vetme për ta kthyer situatën në mënyrën se si ishte më parë dhe për të ulur nivelin e dhunës në zero, ose pothuajse zero.

“Kjo ka nevojë për një vendim i qeverisë,” vazhdoi Liberman. “Shpresoj që kabineti do të marrë vendimet e duhura. Ne kemi ardhur në pikën e kur nuk kemi më asnjë zgjedhje”.