Sot në Izrael dhe kudo ku jetojnë hebrenjtë nis festa e Hanukah, Festivalit të Dritave. Këtë vit ajo nis në mbrëmjen e së dielës së 2 dhjetorit 2018 dhe përfundon në mbrëmjen e së hënës, më 10 dhjetor. Sipas kalendarit Hebraik, ajo fillon ditën e 25-të të muajit Kislev. (Në foton kryesore, ish-ambasadori i Izraelit në Shqipëri, David Cohen, duke ndezur qiririn në Presidencë,së bashku me Rabinin Yoel Kaplan dhe ish-presidentin Bujar Nishani).

Çfarë është festa e Hanukah?

Hanukah, apo siç njihet ndryshe “Festa e Dritave” (ose “Festivali i Dritave), zgjat për tetë ditë e netë.

Sa qirinj ndizen në Hanukah?

Një Shandan (Hanukia) unik me 9 krahë për qirinj, përdoret për këtë festë. Ndezja e qirinjve është akti kryesor gjatë Hanukasë. Qiriu i mesit shërben si qiri ndezës për të tjerët dhe qiriu i parë në të djathtë është qiriu që ndizet në ditën e parë dhe çdo ditë shtojmë nga një qiri të ndezur.

Në këtë mënyrë në ditën e tetë do të kemi të nëntë qirinjtë e ndezur që simbolizojnë djegien e lëndës djegëse pas fitores së Makabenjve.

Çfarë simbolizon Hanukah?

Hanukah është një festë që simbolizon fitoren e Makabenjve mbi ushtrinë greke-siriane të udhëhequr nga Antioku, si dedikim ndaj Tempullit të Dytë që u përdhos gjatë pushtimit greko– sirian.

Mrekullia e Hanukasë konsiston në faktin se dritat e Hanukias u dogjën për 8 ditë rresht pavarësisht sasisë së vogël të lëndës djegëse që mjaftonte vetëm për një ditë.

Çfarë hamë për Hanukah?

Hanukah është një festë e gëzueshme sidomos për fëmijët. Ushqimi tradicional për këtë festë është ushqimi i skuqur ne vaj sidomos petullat që mbushen me reçel dhe quhen “Sufganjot”.

Të gjithë anëtarët e familjes luajnë me lojën Sevivon dhe rituali i vjetër ku u jepej fëmijëve lekë xhepi është konvertuar në dhënien e dhuratave gjatë kësaj periudhe festive.

Festimet në Shqipëri dhe Kosovë

Festa e Hanukah është organizuar rregullisht vitet e fundit në Shqipëri dhe Kosovë.

Dy presidentët e fundit të Shqipërisë, Bujar Nishani dhe Ilir Meta, kanë organizuar pritje zyrtare për të nderuar festën e Hanukasë në Presidencë, ku kanë qenë të pranishëm edhe ambasadorët e radhës të Izrelit në Shqipëri, David Cohen dhe Boaz Rodkin, diplomatë dhe politikanë të ndryshëm.

FOTO NGA FESTIMET