Shqipëria është një nga 40 vendet pjesëmarrëse në panairin “Agrisrael 4.0” që po mbahet në datat 24-27 qershor në shtetin hebraik.

Ky aktivitet është organizuar nga qeveria izraelite, për të  shënuar revolucionin e katërt bujqësor që u mundëson vendeve në mbarë botën të përballojnë prodhimin, qëndrueshmërinë dhe sfidat e tjera duke përdorur më pak burime, sipas modelit izraelit.

Sipas ambasadës shqiptare në Izrael, në “Agrisrael 4.0” marrin pjesë në një grup përfaqësuesish nga disa biznese nga Shqipëria.

“Agrisrael 4.0 është një event ku prezantohet ajka e bujqësisë izraelite. Ne përfitojmë njohuri për shumë arritje e gjetje teknologjike, sidomos futjen e elektronikes, si dhe bashkëpunime për prodhime te reja ne fruta, farëra, etj., qe janë pjese e teknologjisë moderne. Sigurisht dhe sera high-tech, teknika ujitje, plehërime dhe prodhime organike etj”, tha për gazetën në një komunikim nga Izraeli, Edmond Mara, specialisti i agrobiznesit dhe Këshilltari për Bujqësinë pranë Ambasadës së Izraelit në Tiranë.

Dje, me grupin e biznsesmenëve shqiptarë ishte edhe Ambasadori i Shqipërisë në Izrael, Dr. Bardhyl Canaj.

“Kjo bëhet me qëllim të organizimit të takimeve B2B midis mysafirëve dhe kompanive izraelite, vizitave në terren, rrjeteve dhe mundësive për të takuar kolegët , ndajnë dhe shkëmbejnë njohuritë, diskutojnë dhe eksplorojnë bashkëpunimet, takohen me kompanitë izraelite dhe vizitojnë serrat moderne të ndërtuara në Izrael, si dhe vëzhgojnë teknologjinë më të re në sistemet e ujitjes”, shkruan ambasada shqiptare në një njoftim të saj në rrjetet sociale.

Janë disa kompani të njohura izraelite që bashkëpunojnë me ato shqiptare, vetë Z.Mara është përfaqësuesi i “P.Marom – Construction & Projects Services Ltd”, e cila ka zbatuar edhe projekte të saj në disa sera në Shqipëri, siç shikohet edhe nga fotot që sjell gazeta “Izraeli Sot”.