Kryetari i Kuvendit, Gramoz Ruçi, u takua me përfaqësues të Komitetit Amerikan Hebraik, të kryesuar nga Drejtori Ekzekutiv i Këshillit, z. David Harris, të cilët ndodhen për një vizitë zyrtare në Tiranë. Gjatë këtij takimi u diskutua për çështje të sigurisë në Ballkanin Perëndimor, mbi partneritetin midis SHBA-së dhe Shqipërisë për paqe e stabilitet  në rajon dhe më gjerë, mbi rolin e Shqipërisë si një faktor paqeje e stabiliteti në rajon dhe mbi bashkërendimin e përpjekjeve kundër antisemitizmit.

Kryetari i Kuvendit i informoi anëtarët e delegacionit mbi përpjekjet dhe kontributin e Shqipërisë, si një vend anëtar i NATO-s dhe në prag të hapjes së negociatave të anëtarësimit në BE, për zhvillimin, sigurinë dhe paqen në rajon, “Përpjekjet e vendit tonë në këtë drejtim do të vazhdojnë të rriten edhe gjatë Presidencës shqiptare të OSBE-së për vitin 2020 si edhe gjatë procesit të kandidimit për një vend jo të përhershëm në Këshillin e Sigurimit të OKB-së për periudhën 2022-23. Roli i SHBA-së mbetet vendimtar për konsolidimin e paqes, mirëqenies dhe sigurisë në Ballkanin Perëndimor. Shqipëria i është mirënjohëse ShBA-së sepse kanë shpëtuar dhe garantuar mbijetesën e kombit shqiptar në momentet vendimtare të historisë e përballë rreziqeve të copëtimit dhe aktualisht për mbështetjen e reformave, sidomos të reformës në drejtësi. ”, vuri në dukje Kryetari i Kuvendit, Gramoz Ruçi.

Kryetari i Kuvendit nënvizoi gjithashtu se Shqipëria ishte ndër vendet e para që iu bashkuan koalicionit ndërkombëtar kundër terrorizmit dhe ISIL, Shteti Islamik i Irakut dhe Levantit, nën udhëheqjen e SHBA. Deklarata e Partneritetit Strategjik SHBA-Shqipëri, nënshkruar më 20 prill 2015, fokusohet në fushën e sigurisë, energjisë, sundimit të ligjit, mirë-qeverisjes, tregtisë dhe ekonomisë.

Shqipëria mbështet fuqishëm dialogun Kosovë-Serbi dhe mendon se rezultati përfundimtar duhet të jetë një dokument ligjor i detyrueshëm për normalizimin e plotë të marrëdhënieve midis dy shteteve. Vendi ynë përshëndet përpjekjet e Maqedonisë së Veriut për një shoqëri funksionale multietnike, bazuar në zbatimin e plotë të Marrëveshjes Kuadër të Ohrit, si edhe arritjet e Qeverisë për forcimin e bashkëpunimit rajonal dhe zgjidhjen e çështjeve me fqinjët dhe përparimin e Maqedonisë së Veriut drejt NATO-s. Në kuadër të rolit si një faktor paqeje e stabiliteti, Shqipëria kontribon për përmirësimin e mëtejshëm të marrëdhënieve me Serbinë, Greqinë, Malin e Zi dhe Turqinë.

Shqipëria ka dhe mbështet marrëdhëniet shumë të mira, me Izraelin, të cilat bazohen në një miqësi të vjetër dhe aktualisht po punohet edhe për fuqizimin  e bashkëpunimit parlamentar dhe shtimin  e  projekteve të bashkëpunimit në të gjitha fushat.  “Të dy kombet tona, vuri në dukje Kryetari i Kuvendit, z. Ruçi, kanë kaluar histori të ngjashme dhimbjesh e vuajtjesh dhe kanë ditur të mbijetojnë. Të dy popujt tanë e dinë mirë se çdo të thotë që kombet e vogla të luftojnë dhe të mbijetojnë përballë rreziqeve të historisë.”

Në përgjigje të interesimit të pjestarëve të delegacionit, kryetari i Kuvendit iu përgjigj edhe pyetjeve të tyre mbi ecurinë e reformave, perspektivën  e procesit të hapjes së negociatave, situatën politike në Shqipëri, funksionimin e Kuvendit dhe zgjedhjet e 30 qershorit. Kryetari i Kuvendit nënvizoi se zgjedhjet e 2017 ishin zgjedhje të bashkëorganizuara e bashkëdrejtuara nga maxhoranca dhe opozita, për të cilat nuk pati asnjë kontestim dhe opozita nuk ka paraqitur asnjë provë në gjykatë për shkëljet e pretenduara së fundi; opozita ka pasur të gjithë hapësirën e nevojshme në Kuvend për të paraqitur alternativat dhe ushtruar rolin e saj ligjvënës dhe kontrollin parlamentar; Kuvendi funksionon normalisht dhe ka shumicën e nevojshme për të miratuar çdo akt ligjor në mbështetje të Kushtetutës; dhe se zgjedhjet e 30 qershorit u zhvilluan të qeta dhe në respekt të Kushtetutës dhe ligjit.

“Ju falenderojmë për sqarimet tuaja të plota e të detajuara, vuri në dukje Drejtori Ekzekutiv i Këshillit, z. David Harris. Mësimi i madh që nxorrëm nga ky takim është besimi i plotë i Shqipërisë të Shtetet e Bashkuara të Amerikës dhe kontributi vendimtar i saj në mbijetesën e kombit shqiptar, zhvillimin demokratik të Shqipërisë dhe reformat e kryera. Këtë mësim do ta marrim me vete dhe do tia transmetojmë qeverisë së Shteteve të Bashkuara.”