Në Tiranë mund të ngrihet një qendër Cyber Security, bazuar mbi modelin izraelit. Ky ishte propozimi i CEO-t të Divizionit Cyber Security dhe Marketing të Kompanisë ELTA-IAI (www.iai.co.il) që operon në fushën e Cyber Security, gjatë takimit me Ambasadorin e Shqipërisë në Izrael, Dr.Bardhyl Canaj.

Bëhet fjalë për një bashkëinvestim me organet shtetërore shqiptare për të krijuar në Tiranë qendrën mbi Cyber Security.

Ambasadori i Shqipërisë në Izrael, Dr.Bardhyl Canaj, së bashku me Drejtorin e Departamentit të Ballkanit në Ministrinë e Jashtme të Izraelit, Dan Oryan, zhvilluan një vizitë pune në qytetin e Ashdodit. Ata u takuan edhe me drejtuesit e lartë të Kompanisë ELTA-IAI (www.iai.co.il) që operon në fushën e Cyber Security.

“Synimi i këtyre takimeve ishte fillimi punës për Nënshkrimin e një Marrëveshjeje binjakëzimi mes Bashkisë së Ashdodit dhe asaj të Durrësit, me Interes të përbashkët në projektet infrastrukturore, portuale, historike, kulturore e artistike, etj.

Ndërkohë që me interes të veçantë ishte propozimi i CEO-t të Divizionit Cyber Security dhe Marketing-ut, për bashkëinvestim me organet shtetërore shqiptare për të krijuar në Tiranë qendrën mbi Cyber Security.

Të dy këto projekte, shënojnë fillimin e një axhende të ngjeshur pune ndërmjet autoriteteve përkatëse shqiptare me ato izraelite, për gjysmën e dytë të vitit 2020, në fusha me interes strategjik për Shqipërinë dhe Izraelin”, shkruan ambasada shqiptare në njoftimin e saj.