Rrjeti i Grave për Zhvillimin e Paqes (WWPN) ka prezantuar mbi një mijë gra eminente në botë të cilat kanë punuar për ndaljen e luftërave dhe krijimin e paqes.

Dhe në ballinë ku është prezantuar ish-presidentja e Liberisë dhe fituesja e çmimit Nobel është edhe ish-kryenegociatorja e Kosovës në dialogun me Serbinë, Edita Tahiri.

“Rrjeti i Grave për Zhvillimin e Paqes (WWPN) prezanton mbi njëmijë gra eminente në botë që kanë punuar për ndaljen e luftërave dhe krijimin e paqes. Në ballinë janë prezantuara ish presidentja e Liberisë dhe fituesja e çmimit Nobel, kryenegociatorja e Filipineve dhe unë”, shkruan Tahiri në rrjetet sociale.

Disa javë më parë, ish-ministrja e Punëve të Jashtme të Kosovës (1991-2000), Edita Tahiri, e konsideroi njohjen e Kosovës nga Izraeli si një ngjarje historike, njëherësh duke falenderuar edhe kryeministrin Benjamin Netanyhau.

“Njohja e Kosovës nga Izraeli është një ngjarje historike, me të cilën shteti jonë mori një fuqizim të madh në planin ndërkombëtar, duke marrë parasysh se Izraeli është një fuqi botërore me ndikime të mëdha në marrëdhëniet ndërkombëtare. Falënderime të përzemërta për Kryeministrin Netanjahu, Izraelin dhe popullin ebrej me të cilët na lidh një histori e ngjashme tragjike. Pafund mirënjohëse Presidentit amerikan Trump që bëri të mundur këtë njohje me rëndësi të veçantë për paqen në rajon dhe gjeopolitikën perëndimore. Jemi duke brohoritur nga gëzimi së bashku me shokët e mi të studimeve në Universitetin e Harvardit dhe shumë miq tjerë izraelit që patën simpati e mbështetje të vazhdueshme që kjo njohje historike të ndodh. ”, shkruan ajo në një postim të saj në Facebook.

Në prill 2017, Edita Tahiri, asokohe Ministrja për Dialog, me ftesë të Institutit për Studime të Sigurisë Kombëtare të Izraelit (INSS) në Tel Aviv, mori pjesë në seminarin për çështje të negociatave paqësore dhe ndërkulturore të organizuar nga ky institut.

Folësit kryesor në këtë seminar ishin ministrja Edita Tahiri, ish-gjeneral majori izraelit dhe ish-Ambasador i Izraelit në Kinë, Matan Vilnai, profesori Iliai Alan dhe David Gordon, hulumtues dhe bashkëkryesues të seminarit në INSS.