Shqipëria organizoi forumin ballkanik kundër antisemitizmit dhe për përfshirjen e Shqipërisë në këtë nisëm në studion e “Ilva Now” televizionin “Euronews Albania” ishte i ftuar Geront Kureta kryetar i komunitetit hebre, i cili tregoi se ishte një ndër forumet e para virtuale ku ai kishte marrë pjesë.

Për Shqipërinë është diçka shumë pozitive zhvillimi i këtij forumi në vend duke marrë parasysh se jemi një vend me shumicë myslimane.

“Jemi i pari vend në rajon që zhvillon një konferencë të tillë, pjesëmarrja ishte edhe me qeveritarë nga vendet e rajonit, Mali i Zi, Maqedonia, Kosova patjetër, dhe të ftuarit ishin nga Izraeli, Europa, Shtetet e Bashkuara të Amerikës. Është një hap shumë pozitiv në luftën kundër antisemitizmit në rrafshin global”,- u shpreh Kureta.

“Në momente të tilla siç është kriza në botë ka gjithmonë një tendencë të qartë të rritjes të antisemitizmit dhe besoj që ky është momenti më i mirë (i zhvillimit të forumit),” – tha Geront Kureta.

Ndërkaq në lidhje të drejtpërdrejtë ishte Felicita Jakoel, presidente e hebrenjve nga Shqipëria.

Ajo tha se hebrenjtë e Shqipërisë janë dëshmitar se në Shqipëri nuk ka pasur antisemitizëm pavarësisht vuajtjeve në kohën e komunizmit që kanë ndodhur në gjithë rajonin jo vetëm në Shqipëri.

Nga ana tjetër përsëri në një lidhje të drejtpërdrejtë, Valentina Leskaj, anëtare e bordit këshillues në lëvizjen kundër antisemitizmit, tha se rëndësia e këtij takimi të bërë në Shqipëri vjen për dy arsye.

Së pari ajo përmendi vetë çështjen që i adresohet, çështjen e antisemitizmit që është mjaft delikate dhe së dyti Leskaj tha se është Parlamenti Shqiptar ai që ka adoptuar definicionin për antisemitizmin.

Sa i përket informacionit për çfarë është Holokausti si Leskaj ashtu dhe Kureta ranë dakord që jo të gjithë ishin të informuar mjaftueshëm. Kryesisht brezi i ri është ai nuk ka shumë informacion rreth ngjarjes edhe pse për të flitet edhe në librat shkollor.

Ndërkaq Felicita Jakoel apeloi për njohjen e historisë dhe edukimin si format e vetme për ndalimin e antisemitizmit.