“Izraeli ka të ngjarë të jetë vendi i parë që do të dalë nga [kriza] e koronavirusit në javët e ardhshme,” tha të enjten Kryeministri izraelit Benjamin Netanyahu.

“Është një bekim i madh,” shtoi ai.

Kryeministri më jetëgjatë i Izraelit vuri në dukje se të Mërkurën rreth 65,000 qytetarë u vaksinuan kundër COVID-19 dhe se ai shpreson që deri në fundjavën e ardhshme shteti do të ketë kapacitetin për të inokuluar 100,000 njerëz në ditë.

Duke iu referuar vendimit të qeverisë për të mbajtur shkollat e hapura ndërsa Izraeli hyn në bllokimin e tretë kombëtar, Netanyahu theksoi se ajo u bë me qëllim që “nxënësit të mos humbin mësimet dhe për t’ua bërë më të lehtë prindërve”.

Më herët të Enjten, Drejtori i Përgjithshëm i Ministrisë së Shëndetësisë Prof. Hezi Levi tha se qëllimi i shtetit është të inokulojë katër milion qytetarë deri në Mars 2021.

“Kemi mjaft vaksina,” tha ai, “dhe shpresoj ta përmbushim me sukses këtë qëllim. E them këtë me shumë kënaqësi: Izraeli është vendi që vaksinoi shumicën e njerëzve [për frymë] – 180,000 qytetarë [që nga e enjtja]. “