Universiteti “Fehmi Agani” në Gjakovë shënon Ditën Ndërkombëtare të Përkujtimit të Holokaustit, e cila këtë vit i është kushtuar albanologut austriak – hebre Norbert Jokl, e organizuar nga Kosovo Jewish Organization (KJO) dhe nga Instituti për Trashëgiminë Shpirtërore dhe Kulturore të Shqiptarëve në Shkup.

Rektori i Universitetit “Fehmi Agani” në Gjakovë, Prof. Ass. Dr. Artan Nimani, i përshëndeti të pranishmit dhe u tha se “kjo ngjarje tashmë është bërë tradicionale për universitetin, duke i kushtuar rëndësi të veçantë përkujtimit të kësaj dite jo vetëm për komunitetin hebre, por për mbarë njerëzimin, kjo ngjarje është e pakrahasueshme për nga tmerri e dhimbja, duke ndjerë obligim moral e shpirtëror, përkujtimin dhe lavdinë mbi të”. Njëherit theksoi rolin e rëndësishëm të shqiptarëve për të shpëtuar hebrenjtë, të cilët në familjet e tyre kanë strehuar shumë hebre që kishin ikur nga vendet tjera, apo jetonin në Kosovë dhe Shqipëri.

Në këtë ngjarje morën pjesë përfaqësues diplomatikë, përfaqësues të institucioneve lokale në Gjakovë, përfaqësues të bashkësive fetare, studiues, profesorë dhe studentë. Ndërsa, Ambasadori izraelit në Maqedoni, Dan Oryan, përmes një video mesazhi ka përshëndetur dhe falënderuar për organizimin, duke shpjeguar rolin, rëndësinë dhe vlerat e përkujtimit të Holokaustit.

Pjesëmarrësit dëgjuan kumtesat për albanologun austriak – hebre Norbert Jokl, të Prof. Dr. Anton N. Berisha nga Universiteti i Kalabrisë dhe të Prof. Dr. Skender Asani nga Instituti për trashëgimi kulturore të shqiptarëve, nga Shkupi.

Ngjarja u përcoll me performancë orkestrale nën dirigjimin e Prof. Kastriot Sada.

Në fund, Universiteti “Fehmi Agani” në Gjakovë ndau certifikata për pjesëmarrësit e trajnimit për përfitimin e njohurive mbi Holokaustin.