Tre fëmijë kosovarë ndodhen tashmë në Izrael, për të marrë trajtim të specializuar mjekësor për shkak të problemeve të tyre me zemrën, pas marrëveshjes së arritur, më 24 mars 2021, midis Ambasadës së Kosovës në Jeruzalem dhe organizatës humanitare izraelite, “Save a Child’s Heart”.

Simon Fisher, drejtuesi ekzekutiv i organizatës humanitare izraelite, “Save a Child’s Heart” (Shpëto një Zemër Fëmije), bashkëpunoi ngushtë me Ambasadën e Kosovës në Izrael, për të bërë të mundur udhëtimin e tyre në Izrael, ku ai veçon rolin dhe ndihmesën e madhe të ambasadores kosovare Ines Demiri, por edhe të Ambasadorit Dan Oryan – Drejtor pranë Departamentit për Ballkan në Ministrinë e Punëve të Jashtme të Izraelit.

“Ne jemi një organizatë izraelite dhe sa më shpejt që kemi dëgjuar për marrëdhëniet diplomatike midis dy vendeve tona dhe hapjen e ambasadës në Jeruzalem ishte thjesht gjëja e duhur për të bërë si një gjest i vullnetit të mirë midis dy kombeve tona”, tha Fisher në një komunikim me gazetën “Izraeli Sot”.

Gjithçka u bë e mundur, përmes mbështetjes financiare, nga ana e MASHAV, një organizatë brenda Ministrisë së Jashtme të Izraelit, që është e fokusuar në programet e ndihmave ndërkombëtare me palë të treta.

“Ne kemi trajtuar deri më tani më shumë se 5700 nga 62 vende, përfshirë katër fëmijë nga Kosova. Çdo fëmijë që sjellim në Izrael kërkon që ne të mbledhim 15,000 dollarë. MASHAV bujarisht financoi 4,000 dollarë për biletat e fluturimit të grupit aktual”, tha Fisher.

Fëmijët nga Kosova do të trajtohen në Izrael në Spitalin e Fëmijëve Sylvan Adams (Sylvan Adams Children Hospital) të sapo ndërtuar.

“Ne shpresojmë të zhvillojmë një program për të përfituar më shumë fëmijë nga vendet fqinje të Kosovës. Shpresoj që në të ardhmen kur të sjellim fëmijë shtesë mund të tërheqim mbështetje financiare për të mbuluar shpenzimet e fëmijëve nga diasporët hebraike dhe shqiptare”, theksoi drejtuesi ekzekutiv i organizatës humanitare izraelite.