Nga Dash Frashëri, botues i “Izraeli Sot”

Kur më 9 shkurt 2015, Komisioni parlamentar për Politikën e Jashtme zhvilloi një seancë dëgjimore me kandidatin e propozuar për ambasador të Shqipërisë në Izrael, Dr.Bardhyl Canaj, ish-Konsulli i parë i Nderit të Shtetit Hebraik në Shqipëri, u shpreh para deputetëve se “marrëdhëniet politike Shqipëri-Izrael kanë konfirmuar bazat e tyre solide qysh me mbrojtjen që shqiptarët i kanë bërë hebrenjve gjatë Luftës së Dytë Botërore, por edhe me qëndrimet konsekuente të Shqipërisë ndaj procesit të paqes dhe konfliktit në Lindjen e Mesme”.

Tani pas më shumë se gjashtë vjetësh, Bardhyl Canaj, i cili është ambasadori i pestë i Shqipërisë në Izrael, pas Dashnor Dervishit, Bashkim Dinos, Tonin Gjurajt dhe Bujar Skendos, thotë: “Sa më shumë e njoh Izraelin, aq më shumë e dua këtë vend”.

Më 22 korrik 2015, Presidenti Bujar Nishani dekretoi emërimin e Bardhyl Canajt, si ambasadori i Republikë së Shqipërisë në Izrael, ndërsa katër muaj më pas, në datën 9 nëntor 2015, Ambasadori Bardhyl Canaj i paraqiti Letrat Kredenciale Presidentit të Shtetit të Izraelit, Reuven Rivlin, në një ceremoni zyrtare, tepër miqësore dhe të ngrohtë. Presidenti i Izraelit vlerësoi kontributin dhe sakrificat e popullit shqiptar për shpëtimin e hebrenjve gjatë Luftës së Dytë Botërore.

Welcoming new Ambassador of Albania to Israel, H.E. Dr. Bardhyl Canaj @IsraelMFA pic.twitter.com/cZLaQV7LJI

— Reuven Rivlin (@PresidentRuvi) November 9, 2015

Aktiviteti i parë ishte shumë domethënës: Në datën 28 nëntor 2015, me rastin e Festës së Flamurit, Ambasada organizoi një aktivitet me komunitetin shqiptaro-hebre. Në këtë aktivitet morën pjesë rreth 100 veta, të ardhur nga gjithë qytetet e Izraelit: Jerusalem, Haifa, Beer Sheva, Karmiel, Ashdod, Rishon Lezion. Ishte i pranishëm edhe konsulli i Nderit të Shqipërisë në Haifa, z. Avraham Rinot.

Për t’u pasuar me një axhendë të ngjeshur diplomatike, por dhe me kontributin në nënshkrimin e marrëveshjeve të ndryshme midis Shqipërisë dhe Izraelit: Marrëveshja mes Universitetit Politeknik të Tiranes dhe Universitetit Shtetëror të Tel Avivit (10 prill 2016); marrëveshja e bashkëpunimit mes Arkivit Qendror të Shtetit dhe Institucionit të Holokaustit, Yad Vashem (31 tetor 2016).

Ambasadori i Shqipërisë në Izrael, Bardhyl Canaj, u takua me Kryebashkiakun e Tel Avivit, Ron Hulfai, per bashkepunim me Bashkinë e Tiranes, me kryetarin e Bashkisë së Ramat Gan, ku diskutua për bashkëpunimin dhe marrëveshjen e binjakëzimit me bashkinë e qytetit të Korçës, ashtu siç mori pjesë edhe në bisedime midis kryetarëve të Bashkive, Dritan Leli dhe Miriam Feirberg, për bashkepunimin e ardhshem mes bashkive të Vlores dhe Netanias.

Takimet me njerëzit e letrave dhe të artit ishin në fokusin e ambasadorit të ri shqiptar: shkrimtarin e njohur izraelit, Amos Oz; “Ruppin Academic Center”, ku biseda u fokusua në gjetjen e rrugëve për bashkëpunimin me Universitetet dhe Institucionet Akademike shqiptare, apo me përfaqësues të operatorë turistikë izraelitë, në prag të nisjes së fluturimit të parë direkt Tel Aviv-Tiranë.

Më 15 mars 2018, Ambasadori Canaj, u takua me Drejtoreshën e American Jewish Committee, dega Izrael, Avital Leiboviç, në zyrën e saj në Tel Aviv, e cila sot është një nga avokatet më të mëdha të Shqipërisë dhe Kosovës në Shtetin e Izraelit dhe botën hebraike. Surpriza ishte prania e bustit të heroit kombëtar të Shqipërisë, Skënderbeut, në zyrën e saj.

Ambasadori Canaj kontribuoi direkt që Ministri i Bujqesise i kohës, Niko Peleshi ta përfundont me sukses vizitën e tij në Izrael (10 maj 2018), me ftesë te Ministrit te Bujqesise se Izraelit, Uri Ariel, ashtu siç u prit në Tel Aviv, ministrja Xhaçka përmes një ceremonie zyrtare nga Ministri i Mbrojtjes i Izraelit, Avigdor Liberman (23 maj 2018), apo kur Ministri i Turizmit dhe Mjedisit, Blendi Klosi, zhvilloi një takim pune me ministrin izraelit te Turizmit Yariv Levin në Izrael (13 shkurt 2019).

Ambasadori Bardhyl Canaj thotë se, përfaqësimi i Shqipërisë Eurovision 2019 me këngëtaren Jonida Maliqi ishte një nga tre ngjarjet ku “publiciteti” për Shqipërinë në Izrael u rrit tej mase, përfshirë edhe dy ndeshjet e futbollit midis dy vendeve në “Elbasan Arena” në Elbasan dhe “Sami Hoffer” në Haifa.