“Brezi i ri shqiptar po kërkon të integrohet në teknologjinë e lartë dhe qeveria në Tiranë dëshiron të promovojë bashkëpunimet me sipërmarrësit izraelitë,” tha Roi Shaposhnik, themelues dhe CEO i ALIT, i cili po organizon një delegacion nga Izraeli muajin e ardhshëm për një konferencë në Shqiperi.

Shqiptarët duan të bashkëpunojnë me teknologjinë e lartë izraelite

Mungesa globale e fuqisë punëtore dhe ngadalësimi ekonomik, që prek kompanitë e mëdha të teknologjisë dhe i bën ato të pushojnë nga puna punëtorët, ka përshpejtuar dhënien e projekteve të zhvillimit te kompanitë, qofshin ato jashtë apo afër vendit. Vende si Rumania dhe Bjellorusia janë përdorur vitet e fundit si grupe të personelit teknologjik për kompanitë izraelite, dhe Ukraina u përdor si e tillë deri në shpërthimin e luftës atje. Megjithatë, pavarësisht furnizimit ekzistues, kompanitë izraelite të teknologjisë së lartë ende përjetojnë një mungesë kritike të personelit. Tani, Shqipëria dëshiron të futet në hartën e “outsourcing” për projektet softuerike, gjithashtu edhe për teknologjinë e lartë izraelite.

Muajin e ardhshëm (mars), një delegacion me të ftuar të teknologjisë së lartë nga Izraeli do të shkojë në një konferencë në Shqipëri, ku do të takojnë sipërmarrës dhe zyrtarë qeveritarë, duke përfshirë kryeministrin e Shqipërisë, Edi Rama, drejtues të lartë të qeverisë, zyrtarë dhe kryetarin e Bashkisë së Tiranës, Erion Veliaj. Konferenca organizohet nga ALIT, kompani e cila operon në të dy vendet.

“Ne inicuam konferencën për kompanitë izraelite, në mënyrë që biznesmenët izraelitë të njohin potencialin që shtrihet në Shqipëri”, tha Roi Shaposhnik, bashkëthemelues dhe CEO i ALIT.

Kompania është themeluar vitin e kaluar dhe operon në katër akse kryesore: outsourcing i personelit shqiptar, sherbime IT dhe kibernetike, ngritja e fermave të serverëve në Shqipëri dhe zhvillimi i inkubatorëve të teknologjisë në bashkëpunim me qeverinë në Tiranë.

Investime të shumta për të modernizuar tregun e punës në Shqipëri

Shqipëria është një republikë në Evropën Juglindore, me rreth tre milionë banorë, shumica e të cilëve janë myslimanë suni, ajo kufizohet me Maqedoninë e Veriut, Kosovën dhe Malin e Zi. Qeveria atje ka investuar shumë vitet e fundit për të modernizuar tregun e saj të punës. Kështu, për shembull, në Shqipëri ka 40 institucione akademike, me mijëra të diplomuar çdo vit. Qeveria shqiptare bën përpjekje të mëdha dhe investon burime për të trajnuar brezin e ri në vend për profesionet e teknologjisë së lartë dhe në përgjithësi për tregun bashkëkohor të punës. Gjithashtu, aty krijohen zona të caktuara industriale për industrinë e teknologjisë së lartë dhe jepen përfitime tatimore, për të tërhequr sipërmarrës nga e gjithë bota.

Izraeli ka marrëdhënie të mira me qeverinë në Tiranë, madje presidenti shqiptar vizitoi Izraelin në vitin 2015 dhe u takua me presidentin e atëhershëm të vendit, Reuven Rivlin. Në konferencë merr pjesë edhe Ambasada e Izraelit në Tiranë. Ambasadorja Galit Peleg tha se “Shqipëria është një vend shumë miqësor ndaj Izraelit. Ajo ka shumë nevojë për investime, por jo vetëm kaq. Një nga sfidat me të cilat përballet ky vend është emigracioni negativ, veçanërisht i të rinjve që largohen. Për këtë arsye,  qeveria shqiptare inkurajon kompanitë izraelite, veçanërisht në fushën e teknologjisë, të krijojnë vende pune për të rinj të talentuar të diplomuar, në mënyrë që ata të qëndrojnë në Shqipëri, dhe ajo e sheh konferencën si një nismë të mirëpritur, e cila mund të ndihmojë shumë në këtë çështje dhe në fusha të tjera”. /PC.Co.il