Anton Quni, ministri i ri Mbrojtjes në Qeverinë “Kurti” në Kosovë, u shpreh para disa ditësh në një aktivitet të zhvilluar në Prizren (27 janar 2020) me rastin e Ditës Ndërkombëtare të Përkujtimit të Viktimave të Holokaustit, të organizuar nga misioni i OSBE-së në Kosovë në bashkëpunim me Komunitetin Hebre, se “tashmë është i ditur fakti historik i pamohueshëm se Kosova, edhe pse ishte një vend i vogël, nuk i dorëzoi hebrenjtë tek nacional-socialistët, por përkundrazi, në kohë lufte shqiptarët e Kosovës me sukses i fshehën pjesëtarët e këtij komuniteti”.

“Hapja e dyerve të shtëpive për komunitetin hebre, në kohën kur atyre po u kanosej zhdukja, ka marrë vlerësim gjithandej nëpër botë, duke e renditur popullin e Kosovës përkrah mbështetësve dhe mbrojtësve të hebrenjve”, shkruan Quni në mesazhin e tij në rrjetet sociale.

Mesazhi i Qunit

Organizuar nga OSBE – sot në Prizren u shënua, Dita Ndërkombëtare e Përkujtimit të Viktimave të Holokaustit.

Tashmë është i ditur fakti historik i pamohueshëm se Kosova, edhe pse ishte një vend i vogël, nuk i dorëzoi hebrenjtë tek nacional-socialistët, por përkundrazi, në kohë lufte shqiptarët e Kosovës me sukses i fshehën pjesëtarët e këtij komuniteti. Kujdesi dhe mbrojtja atyre iu dha duke u mbështetur në kodin e lashtë të nderit: “besën” i cili nënkupton që kur dikush dikujt i ofron ndihmë dhe e merr në shtëpinë e vet, ai duhet edhe ta mbajë premtimin për mbrojtje.

Gjithashtu, sipas Kanunit, kodit zakonor “Shtëpia e shqiptarit është e Zotit dhe e mikut”.

Hapja e dyerve të shtëpive për komunitetin hebre, në kohën kur atyre po u kanosej zhdukja, ka marrë vlerësim gjithandej nëpër botë, duke e renditur popullin e Kosovës përkrah mbështetësve dhe mbrojtësve të hebrenjve.