Prej më shumë se dy vjetësh (20 shkurt 2019) operon në rrjetin social Facebook një faqe me emrin “Izraeli në Kosovë”, e cila menaxhohet nga persona anonimë dhe me qëllime keqdashëse, për të prishur dhe dëmtuar marrëdhëniet e shkëlqyera midis Izraelit dhe Kosovës.

Burime diplomatike nga Izraeli i thanë gazetës “Izraeli Sot” se ata nuk kanë asnjë lidhje me faqen “Izraeli në Kosovë”, dhe së një grup ekspertësh të “dipomacisë digitale izraelite” kanë mbledhur të gjithë informacionin e nevojshëm dhe janë duke përgatitur një padi penale ndërkombëtare ndaj drejtuesve të saj, të cilën do t’ia referojnë edhe organeve relevante në Kosovë, përfshirë Ministrinë Jashtme, Ministrinë e Drejtësisë dhe Ministrinë e Brendshme në Kosovë.

E ashtuquajtura faqe “Izraeli në Kosovë” ka kryer sulme mediatike të vazhdueshme me synimin dëmtimin e politikës së jashtme të Republikës së Kosovës në marrëdhëniet me Shtetin e Izraelit.

Sipas burimit diplomatik nga Izraeli, me kompletimin e dosjes voluminoze të konsultuar edhe më një nga studiot ligjore izraelite me të njohura në arenën ndërkombëtare, jo vetëm do të kërkohet mbyllja e faqes “Izraeli në Kosovë”, por edhe dëmshpërblime financiare në shumë të konsiderueshme, për akte të qëllimshme me synimin prishjen e marrëdhënieve midis dy shteteve.