Duke filluar nga muaji i ardhshëm, java e punës në Izrael do të shkurtohet me një orë deri, duke arritur kështu në 42 orë, në përputhje me një urdhër shtyrjeje të nënshkruar nga Ministri i Punës, Çështjeve Sociale dhe Shërbimeve Sociale, Haim Katz, pak kohë më parë.

Urdhri zbatohet pas marrëveshjes së arritur nga kryetari i “Histadrut” (Federata e Përgjithshme e Punës në Izrael), Avi Nissenkorn, me punëdhënësit në ekonominë në tërësi.

Shkurtimi i javës së punës u bë i mundur falë një marrëveshje kolektive të përgjithshme të arritur një vit më parë midis Nissenkorn dhe Presidentit të Shoqatës së Prodhuesve të Izraelit, Shraga Brosh. Marrëveshja u miratua dy muaj më parë nga Ministri i Financave, Moshe Kahlon, shkruan portali izraelit, Globes.co.il.

Ndryshimi që do të hyjë në fuqi më 1 prill do të jetë pa ndonjë reduktim në pagë, dhe prej asaj date  paga për orë llogaritet në bazë të 182 orëve të punës në muaj në vend të 186 orëve si aktualisht. Kjo do të thotë një rritje në normën orë për punëtorët me pagë minimale.

Kjo është hera e parë që nga viti 1995 që punëtorët në Izrael kanë përfituar nga një shkurtim në orët e punës. Kjo do të thotë që izraelitët do të punojnë 50 orë më pak në vit, pa humbur pagën. Dita më e shkurtër e punës çdo javë do të përcaktohet nga punëdhënësit, duke marrë parasysh kërkesat dhe nevojat e punonjësve.

“Ky veprim përmirëson balancën midis punës dhe kohës së lirë dhe është një hap i parë i rëndësishëm drejt qëllimit të një jave pune prej vetëm 40 orësh në Izrael”, citohet kryetari i Histadrut, Avi Nissenkorn.