Shqipëria e volejbollit për femra fitoi 3-0 ndaj Izraelit (25:18, 25:16, 25:14) në ndeshjen e zhvilluar në Raanana (të shtunën) dhe të vlefshme për Ligën e Europës, Divizioni i Argjendtë.

Kombëtarja e Volejbollit e drejtuar nga Martiri nuk e pati të vështirë ndaj asaj të Izraelit, me trajner Xhuzepe Kukarinin, duke regjistruar fitoren e dytë në tri ndeshje, pas saj me Gjeorgjinë, po 3-0 në Tbilisi, duke e bërë më të mundshme pjesëmarrjen në “Final Four” në Suedi.

Pikëshënuesja më e mirë e ndeshjes Bici me 19 pikë, ndjekur nga Malik me 13 pikë. Në bllok është dalluar Jaloba dhe Malik të Izraelit me tre mure fituese, pasuar nga Bici dhe Arjola Prenga me dy.

Për Izraelin kjo ishte humbja e dytë në tri ndeshje, përfshirë dhe atë me Austrinë (një fitore me Gjeorgjinë).

Mediet izraelite, Sport5.co.il, e konsideruan ekipin shqiptar tepër të fortë dhe të vështirë, ndërkohë gazeta “Maariv” theksonte faktin se “Shqipëria kishte më shumë eksperiencë, pasi ekipi luante së bashku prej tre vitesh e dominoi plotësisht takimin”.

Tali Marman e Izraelit u dëmtua në kavilje dhe la fushën e lojës, ndërkohë që bllokuesja Sapir Kodorov mungonte për arsye familjare, ndërsa në ekip kishte edhe një 16-vjeçare, Shiral Jenha.

“Pavarësisht humbjes, kjo ndeshje na vlejti për të grumbulluar eksperiencë”, u shpreh pas ndeshjes trajneri Kukarini për “Ynet.co.il”.

Drejtuesit e Federatës Shqiptare të Volejbollit, presidenti Erlind Pëllumbi, zëvendëspresidenti Dashamir Brari, sekretari i përgjithshëm Albens Vokopola, ishin të pranishëm në Raanana. Gjithashtu, i pranishëm ishte dhe ambasadori i Shqipërisë në Izrael, Bardhyl Canaj.

Ndeshja e kthimit me Izraelin do të luhet në Tiranë në pallatin e sportit “Feti Borova” më 30 maj.

Vendin e parë në grupin B e mban Austria me 3 fitore në po aq ndeshje.