Pastori i njohur izraelit, Hanan Lokes, president dhe drejtor ekzekutiv i Aleancës hebreje mesianike të Izraelit dhe një nga pastorët (pleqtë) e një kongregacioni mesianik në Haifa, Izrael, do të vizitojë Shqipërinë dhe do të mbajë një shërbesë, më datë 17 qershor (ditën e diel) në një nga sallat e e Muzeut Kombëtar në Tiranë (ora 10:00) të organizuar nga Ambasada Ndërkombëtare e Krishterë e Jerusalemit në Tiranë.

Sipas Gentjan Dervishaj i Ambasadës Ndërkombëtare të Krishterë të Jerusalemit në Tiranë, pastori 70-vjeçar Hanan Lokes do të vizitojë edhe Divjakën, Burrelin, Novoselen, Insitutin në Kamëz.

Ambasada Ndërkombëtare e Krishterë e Jerusalemit – The International Christian Embassy Jerusalem, ICEJ  – është themeluar në vitin 1980, si një akt mbështetjeje dhe solidariteti me Izraelin dhe popullin jude në afirmimin e tyre për Jerusalemin.

“Nga zyrat e saj qendrore në Jerusalem, ICEJ, ka mundur të jetë prezente me aktivitetet e saj në 170 vende në gjithë botën, ndërkohë që ka degë të saj në mbi 90 kombe, përfshirë edhe Shqipërinë”, thotë pastori Gentjan Dervishaj.

ICEJ është një zë aktiv në pajtimin midis hebrenjve, të krishterëve dhe arabëve, si dhe mbështet kishat dhe kongregacionet në Tokën e Shenjtë.

Gjatë gjithë vitit Ambasada dërgon folës në mbarë botën për të shpjeguar çështje të rëndësishme në lidhje me Izraelin dhe Lindjen e Mesme. Objektivi ynë kryesor është rritja e vetëdijes së krishterë dhe mbështetja e Izraelit duke nxitur udhëheqësit, kishat dhe organizatat që të bëhen ndikime efektive në vendet e tyre në emër të popullit hebre. Po ashtu, mbahen pritje, duke bashkuar bashkësitë lokale hebraike, përfaqësuesit izraelitë dhe udhëheqësit e krishterë në mënyrë që të lehtësojnë pajtimin dhe mirëkuptimin.

ICEJ punon ngushtë me anëtarët e Knesset (Parlamenti izraelit) në projekte të ndryshme në Izrael dhe jashtë vendit, nëpërmjet Grupit të Aleancës Kristiane të Knesset.